“Gənclər Təşkilatları Dayanıqlı İnkişaf Məqsədləri Naminə” təlimləri – Balakən rayonu
2 June 2019
18 May 2019-cu il tarixində Azərbaycan Respublikası Gənclər Təşkilatları Milli Şurasının (NAYORA) təşkilatçılığı və Azərbaycan Respublikasının Gənclər Fondunun maliyyə dəstəyi ilə ADA Universitetində 100-dən çox gəncin iştirakı ilə həyata keçirilmiş "Gənclər Təşkilatları Dayanıqlı İnkişaf Məqsədləri Naminə" konfransının davamlılığının təmin edilməsi məqsədi ilə 2 İyun tarixində Balakən şəhərində fəaliyyət göstərən Gənclər Evində sonuncu təlim görüşü baş tutub.
Təlim görüşü "International Youth Society" təşkilatının ölkə üzrə direktoru Məhbubə Musayeva və ADA Universitetinin əcnəbi tələbələrlə iş üzrə mütəxəssisi Milana İbrahimova tərəfindən Balakən şəhərində müxtəlif gənclər təşkilatlarının üzvü olan və aktiv fəaliyyət göstərən 25 gəncin iştirakı ilə keçirilmişdir.
Təlimdə ilk olaraq Məhbubə Musayeva və Milana İbrahimova NAYORA tərəfindən 9000-dən çox gənc arasında keçirilmiş DİM üzrə sorğunun nəticələrini elan etmiş, daha sonra isə iştirakçılar qruplarda iş şəklində Dayanıqlı İnkişaf Məqsədləri üzrə fəaliyyət planlaması aparıblar.
Qeyd edək ki, digər təlim görüşləri 30 May - Şirvan Gənclər Evi, 31 May - Mingəçevir Gənclər Evi, 1 İyun - Gəncə Gənclər Evi və Şəmkir Gənclərin İnkişaf və Karyera Mərkəzində baş tutub.
